Ḽa Afurika Tshipembe ḽi khou dzhenelela kha u Vusuludza mukano wa Beitbridge
Muvhuso wa Afurika Tshipembe wo ṱanganedza khumbelo i bvaho kha Minisṱa wa Home Affairs ya u vusuludza mikanoni ya rathi u katela na mukano wa Beitbridge.Vho Minisṱa vho sumbedzisa uri mukano wa Beitbridge u khou shumana na vhaendi vha no fhira miḽioni dza sumbe (7 million) nga ṅwaha.
Ḓokotela Vho Aaron Motsoaledi vho vhudza vha u anḓadza mafhungo ngei Piṱori nga Ḽavhuraru uri vho wana thikedzo yo ḓalaho u bva kha Minisṱa wa zwa masheleni Vho Enock Godongwana uri vha thome mushumo hoyu.
Mikano heyi ya rathi i katela Beitbridge une wa vha wa ḽa Zimbabwe , Lebombo une wa vha wa ḽa Mozambikwi , Maseru Bridge une wa vha wa Lesotho , Ficksburg une wa dovha wa vha Lesotho , Kopfontein une wa vha wa ḽa Botswana khathihi na Oshoek une wa vha wa ḽa Eswatwini.
Mushumo uyu wo lavhelelwa uri u ḓo thusa u takusela nṱha tshiimo khathihi na mvelaphanḓa vhukati ha Shango ḽa Afurika Tshipembe khathihi na vhahura vhaḽo u ṱanganya na ḽa Zimbabwe ḽe na ḽone ḽa fara mushumo wa u khwinifhadza mukano waḽo.
Muvhuso wa ḽa Zimbabwe wo fhedza mushumo wa u vusuludza mukano wa Beitbridge nga masheleni a eḓanaho miḽioni dza maḓana mararu a ḽa Amerika (US$300 million) nga murahu ha u shumisana na vha Zimborders consortium.
Mukano wa Beitbridge wo no vha na fhethu hu raru ha u tshimbila zwiendedzi uya nga tshaka dzo fhambanaho u katela dzi bisi ,ma ḽori ,goloi ṱhukhu khathihi na vhaendanganayo. Mukano u dovha wa kona u ṱumanya ḽa Afurika Tshipembe na ḽa Zambia, Botswana, Mozambikwi,Angola ,DRC ,Malawi na Tanzania nga mitshini yeneyi ya maḓuvhano.
Vho ḓokotela Motsoaledi vha ri hoyu mushumo wa u khwinifhadza mikano heyi ya rathi u ḓo thusa u vusuludza na dzibada dzi no ya kha heyi mikano na u kona u ṋea tshumelo yo teaho