SHEMA TV YO DALELA MUVHUNDU WA TSHABILI NGEI BEITBRIDGE
Nga Sharon Moyo
Vharathu na vhakomana vha nṋa vha Tshabili Beitbridge, vho wana vhutshilo ha khwine nga murahu ha u dalelwa nga Shema TV nga Mugivhela wa ḽa fumiṋa ḽa ṅwedzi wa Khubvumedzi 2024.
Shema tv ndi dzangano ḽi topola na u thusa vhashai na zwitshavha u mona na shango hu tshi shumiswa zwa vhudavhidzani. I sedza nga zwa pfunzo, zwa mutakalo na u thusa uri hu songo vha na nḓala. Mushumo wayo ndi wa u takula zwitshavha, u ṋea zwishumiswa zwa ndeme na u ṋea tshirunzi kha muṅwe na muṅwe.
Vharathu na vhakomana vhane vha vha na miṅwaha ya 15, 12, 10 na 6 vha khou dzula nnḓuni ya tshiṱanga ya mavu ine ya shuma sa nnḓu ya u eḓela na u bikela, nga murahu ha u lovha ha mme avho, khotsi avho vho dovha vha mala vha pfuluwa vha sia vhana vha kha nyimele i konḓaho.
Kha nyambedzano na vha Shema TV, makhadzi wa vhana vha khou kundelelwa u ṱhogomela vhana avho nga ṅwambo wa uri vha na vhuḓifhinduleli muṱani wavho fhedzi vho fhulufhedzisa uri vha ḓo vha sedza tshifhinga tshoṱhe.
Kha nyambedzano na vha Lotsha FM, Shema TV yo ri hu khou fhaṱiwa kamara nthihi ya vhana naho zwi songo bviselwa khagala uri i ḓo fhela lini. Vho isa phanḓa vha tshi ri vho wana donesheni ya samende, zwiambaro, na zwiḽiwa u bva kha vhathu na maṅwe madzangano.
Vidiyo ye ya rumelwa kha siaṱari ḽa facebook nga Shema TV yo ita uri lushaka lu pfe lu na dzangalelo ḽa u thusa.
Social Worker wa sibadela tsha Tshabili o ṱuṱuwedza lushaka uri lu farane na u tikedzana nga zwifhinga zwi konḓaho.